Wikang Filipino Daan sa Kaunlaran

ni G. Ricky M. dela Cruz

Hindi maikakailang kakambal ng kultura at tradisyon ng isang bansa ang wikang nalinang. Ang wika tulad ng kultura ang siyang umuukit upang magkaroon ng ganap na pagkakakilanlan at identidad ng isang lahi. Dito sa ating bansa ay malaki ang naging ambag ng wika sa pagsasalin ng karunungan di lamang sa panitikan kundi lalo't higit ang kultura at iba pang aspeto na may kaugnay sa mga bagay na masasabing tatak ng pagka-Pilipino. Ang wika sa madaling sabi ang naging tulay upang maipasa ang kalinangan ng nakaraan sa makabagong henerasyon. 

Maituturing nga na ang mga nagdaang administrasyon sa pamahalan ng ating bansa ay hindi kailanman nagkulang na magpakita ng pagpapahalaga sa ambag at gamit ng wika. Una sa listahan ang dating Pangulong Mauel L. Quezon na nanguna sa pagbuo ng batas upang magkaroon ng Surian ng Wikang Pambansa na layon ay makapili ng isang wikang ituturing na pambansa at gagamitin na opisyal na midyum ng talasatasan sa buong kapuluan. Napili ang Wikang Tagalog bilang pambansang wika sa panahong iyon at ito ay ginamit sa mga pormal na pagpupulong na sagot naman sa di pagkakaunawan ng mga delegado ng pamahalaan buhat sa iba't ibang panig ng bansa.  Sinundan ito ng makabansang pangulo na si Ramon Magsaysay na nagnais na ipagdiwang ang Linggo ng Wika at gamitin ang Wikang Pilipino sa lahat ng mga opisyal na transakyon sa pamahalaan at pagsasalin ng lahat ng dokumento at pangalan ng mga tanggapan mula Ingles patungong wikang Pilipino. Sa panahong ito, napatunayang mas mabilis na nagkakaunawaan ang bawat Pilipino at nagkaroon ng pagkakaisa ang samabayanan. Sa panahon naman ni dating Pangulong Cory Aquino at sa pagkakabuo ng Saligang Batas ng 1987, mas pinaigting ang ipinakitang pagpapahalaga sa wikang pambansa sapagkat Itinagubilin ng umiiral na saligang batas na ang Filipino ay itinuturing na pangunahing wika sa buong kapuluan at inaasahang gagamitin ng lahat ng mga Pilipino. Kaugnay sa itinakda ng batas sinasabi dito na "habang nililinang ang Filipino ay dapat itong payabungin at pagyamanin nang nakasalig sa mga katutubong salitang umiiral sa wikang Filipino at iba pang wika"

Samakatuwid, maliwanag na batid ng nagdaang pinuno ng ating bayan ang kahalagahan ng paggamit ng wika hindi lamang dahil ito ang sarili nating wika kundi ito ay susi ng pagkakaisa at pag-unlad ng ating bayan.

Pansumandali nating iwan ang Pilipinas at maglakbay tayo sa bansang Japan, China, Korea at UAE. ang mga nabanggit na bansang ito ay naging matayog sa kanilang narating na kaunlaran. at kanilang pinatunayan sa buong daigdig na hindi kailanman hadlang ang kanilang mga sariling wikang pambansa sa pagkamit ng kanilang inasam na kaunlaran. Ang Japan sa kanilang wikang Nihonggo ang China sa kanilang Mandarin, at maging ang UAE sa kanilang Arabic ay naghangad na tuwirang gamitin ang kani-kanilang sariling wika sa iba't ibang larang. sila'y hindi nagpasakop sa kolonyal na kaisipan na ang wikang Ingles ay dapat gamitin tungo sa pag-unlad. Ang pagiging First World Countries ng mga nasabing bansa ay tanda na ang wika ay daan ng kaunlaran, pagkakaisa at karunungan.

Magbalik tayo sa ating sinilangang bayan, kamakailan lamang ay nagpanukala si Representante Gloria Macapagal Arroyo na paigtingin ang paggamit ng wikang Ingles sa pagtuturo sa mga paaralan sa Pilipinas.( House Bill No. 311 "AN ACT TO STRENGHTEN AND ENHANCE THE USE OF ENGLISH AS THE MEDIUM OF INSTRUCTION IN PHILIPPINE SCHOOLS")

Ayon kay Representante Arroyo sa kanyang proposed bill: "It's ultimate objective is the improvement of  learning process in schools to ensure quality outputs". Sa pahayag na ito ay tila pinabubulaan ni representante Arroyo na hindi kailanman magiging matagumpay ang wikang Filipino na magamit ito sa iba't ibang disiplina at maging daan ng karunungan at pag-unlad. Tahasan itong sinasalungat ng Komisyon ng Wikang Filipino at maging ng iba't ibang samahang pangwika sapagkat sa kasalukuyan ang mga nagungunang pamantasan ay matagal ng sinisimulan ang paggamit ng wikang Filipino sa pag-aaral ng iba't ibang larang. 

Bilang pangkaraniwang mga Pilipino, ako, ikaw, tayong lahat ay may malaking gampanin na mapangalagaan ang dangal ng ating nakagisnang Wika. Nawa'y hindi masayang ang maraming taon ng pakikibaka ng ating mga ninuno upang tayo ay mapamanahan ng wikang minsang nagpatunay na tayo ay kayang pag-isahin. Ang wikang Filipino tulad ng Nihonngo, Mandarin, Ingles at Arabiko ay tunay na natatangi at may maipagmamalaki sa isa't isa. Hayaan nating ang wikang Filipino ang maghatid sa ating sa kaunlaran ng ating bayan at magsilbing simbolo ng ating pagkakakilanlan. 

MABUHAY ANG WIKANG FILIPINO!